Soheir

Jæja þá er ég komin heim eftir 10 daga ferð til Kaupmannahafnar. Er samt eiginlega enþá þar í huganum..... Ferðin var hreint út sagt FRÁBÆR! Þarna á ég svo sannarlega heima og ég get ekki beðið eftir að flytjast þangað.

Fyrstu vikuna bjó ég hjá Lelu, aðaldansara Shams el amar. Hún býr í höll, húsið hennar er eins og klippt út úr "Hús og híbýli". Hún er með eigið dansstúdíó og heilann gang með 5 stórum skápum fullum af búningum! Einn fyrir modern búninga, einn fyrir pils, einn fyrir heilbúninga, einn fyrir klassíska og einn fyrir allt það sem hún er með til sölu. Þarf eg að nefna að ég keypti eitt stykki búning og 2 auka pils? Enda búningarnir hennar og sérstaklega pilsin "one of a kind", sérsaumuð af íranskri saumakonu.

Fyrsta kvöldið fór ég með henni að sjá hana dansa á veitingastöðum. Það var bara farið í búning heiman frá og svo keyrt eins og brjálæðingur á milli staða. Veitingastaða dansbransinn er einstakur og gaman að sjá hvernig hún "tæklar" kúnnana. Við enduðum svo á Marrocan veitingastað sem heitir Marrakech Kitchen og fengum okkur að borða þar, fullt af sýnishornum af sjúklega góðum mat.

Vikan leið svo með því að ég kannaði allar helstu verslanir og verslunarmiðstaðir bæjarins, labbaði strikið, fór út að borða og hitti gamla vini sem ég á frá því að ég bjó þarna. Einnig fór ég á 8 tíma workshop með Sofiu Vester í Danmarks mavedanserskole, sem by the way er minnsta dansstúdío sem ég hef séð.

Á föstudeginum þurfti ég að flytja, þar sem Lela átti von á allri fjölskyldunni sinni í heimsókn frá Marokkó. Ég tjekkaði mig því inn á hótel í miðbænum og fór svo beina leið út á flugvöll að sækja Josy, sem ætlaði að vera með mér þarna síðustu helgina. Föstudagurinn fór síðan í að versla og svo aftur út með Lelu á veitingahúsa dans rölt. Ætluðum að enda kvöldið á tyrkneskum veitingastað, en á meðan við vorum að borða þar var hringt í Lelu og hún beðin að dansa á lesbíubar...

Á laugardeginum fórum við svo að versla meira og í heimsókn til Lelu. Um kvöldið var síðan lokahóf "sumarskóla Sofiu og Maizenu". Það var búið að biðja okkur að dansa og við gerðum það við frábærar viðtökur. Röltum síðan niður í bæ og komum við á Marrakech Kitchen, maroccan veitingastaðnum sem ég fór á helgina áður. Hittum þar eigandann, Suhail og áttum djúpar spiritual samræður. Hann fór síðan með okkur á Jazzhouse, sem er sko ekki djass staður heldur stór og frábær skemmtistaður sem ég skemmti mér oft á í "gamle dage".

Suhail var búinn að biðja okkur að dansa á veitingastaðnum á sunnudeginum, þannig að eftir að hafa sofið vel út, röltum við aftur niður í bæ. Marrakech Kitchen er rosalega fallegur veitingastaður og sá fínasti arabíski í bænum. Suhail kom fram við okkur sem drottningar, fór með okkur út að borða og keyrði okkur út um allt og sýndi okkur alla Kaupmannahöfn. Eftir að við komum aftur upp á hótel lágum við svo í hláturskasti alla nóttina og alla leiðina heim til Íslands. Þessi ferð var án efa mikil upplifun. Ég lærði sérstaklega mikið um veitingastaðadans, spirituality......og PUMA store......

VIDEO frá Kaupmannahöfn www.youtube.com/soheir1

Jæja, þá er maður komin heim......því miður

Þetta var auðvitað algjört ævintýri eins og alltaf. Komum út á miðvikudegi og fórum út að borða á geðveikum Líbanskum veitingastað. Fengum svona 20 rétti að smakka, nammi namm.

Vöknuðum svo snemma daginn eftir og skráðum okkur inn. Byrjaði daginn á workshoppi hjá Yousri Sharif. Hann var auðvitað alveg frábær og kenndi okkur frekar flókinn dans. Fór síðan og missti mig aðeins á Bazarnum. Varð að drífa mig áður en Josy keypti allt haha. Fann alveg geðveikann tiger búning. Hafði ekki haldið að ég mundi falla fyrir svona, en hann er mjög sérstakur. Best að fela hann fyrir einni sem ég veit að mun falla fyrir honum hehe (þú veist hver þú ert hehehe).

Keppnin var á fimtudagskvöldinu. Josy tók þátt og stóð sig alveg glæsilega vel. Endaði í 3. sæti og hefði mátt vera ofar að mínu og annara mati. En standardinn var mjög hár hjá flestum stelpunum og því mikil samkeppni (kannski fyrir utan einn þjóðflokk, segi ekki meir ). Dómarar voru Mahmoud Reda, Farida Fahmy og Yousri Sharif.

Fór svo á workshop hjá þremur öðrum kennurum: Faridu Fahmy, Tito og Aidu Nour. Farida var alveg ótrúleg. Ég hef heyrt um að fólk fari að grenja á að sjá suma dansa sem snertir þá. En vá ég fór nú bara næstum að grenja yfir kennslunni hjá þessari konu! Ég sver það ég hef aldrei vitað annað eins , hún er stórkostleg!! Hún og Aida voru á toppnum hjá mér í ár. Ég auðvitað dái og dýrka Aidu Nour og hennar stíl. Hún er líka bara svo frábær persóna og einlæg. Ég mun héðan í frá taka öll workshop með henni sem ég kemst á. Já svo keypti ég líka hvítu Galabeyuna hennar. Þarf reyndar að þvo hana, því hún angar af ilmvatni og er með varalitablettum. Held samt að það sé frekar auðvelt að ná úr. Er svo með nokkrar auka ef einhver hefur áhuga. Þær eru ódýrar. Já hehemm, svo keypti ég mér líka alvöru melaya leff kjól. Hefði líka keypt einn rauðann sem Aida Nour ætlaði að koma með fyrir mig, en taskan hennar glataðist á leiðinni og hún fékk hana ekki aftur. Fæ samt annaní staðin, tekur bara smá meiri tíma.

Sýningin gekk ótrúlega vel. Allar voru svaka flottar. Auðvitað þurfti að vera smá drama eins og gengur og gerist. En svona í heildina held ég að allar hafi bara verið ánægðar.  Maher var búinn að semja einn spes dans tileinkaðum og um Mahmoud Reda. Það heppnaðist svo vel að Reda kallinn fékk tár í augun og kom upp á svið og faðmaði Maher. Æ hann er svo yndislegur.

Sunnudagur er alltaf sorgardagur....síðasti dagurinn. Klára workshoppin, kveðja osfr. Manni langar sko ekki baun að fara. Þurftum svo að vakna kl 4 og ná flugi....sem ég missti næstum af. Þurfti að hlaupa út í vél útaf ömurlegri biðraðamenningu svía. Þá var búið að loka gateinu, en ég komst samt með. Það voru þó ekki allir svo heppnir, fullt af fólki sem missti af vélinni (engin af okkur samt)

Jæja, þá er bara að bíða í enn eitt árið....

Jæja, kannski kominn tími á blogg.....

Nóg að gera í dansinum. Ekkert páskafrí þar, sem er ágætt. Erum að leggja síðustu hönd á Shams el Amar dansana sem við lærðum síðast þegar Maher kom. Svo þeir verði nú tilbúnir áður en hann kemur næst og önnur verkefni taka við. Já meistari Maher kemur semsagt aftur í næstu viku! Stoppar stutt í þetta skipti, eða frá 11.-15. apríl. Það þýðir þó ekki að við lærum neitt minna því við fáum 4 x 2,5 tíma með honum og ætlum allavega að læra 1 melaya dans. Ef þið viljið skrá ykkur þá er það hægt á www.kramhusid.is . Bæði workshop fyrir miðstig og framhald!

Við ætlum einnig að nýta tækifærið á meðan Maher er hérna og skella upp einni pjúra magadanssýningu! Þetta verður fjáröflunarsýning á okkar vegum, svo við getum haldið uppi heimasíðu og öðru skemmtilegu. Hún verður haldin í Þjóðleikhúskjallaranum föstudaginn 13. apríl, kl. 21. Svo verður öllum frjálst að vera áfram og skemmta sér eftir sýninguna. Fram koma magadanshópur Kramhússins "Raqs Sharki", Maher Kishk og hópurinn hanns "Shams el Amar", ýmsir dúettar, sóló, byrjendur og miðstigshópurinn úr Kraminu. Mæli með þessari sýningu sem verður fjölbreytt.

Sumir hafa velt fyrir sér "Hver er munurinn á Raqs Sharki og Shams el Amar? Eða er einhver munur, eru þetta ekki allt sömu stelpurnar osfr.?  Jú það er munur! Raqs Sharki er eins og ég sagði áðan magadanshópur Kramhússins, sem samanstendur af nemendum í framhaldshóp. Þær eru með áherslu á egypskann klassískan magadans, svona eins og flestir þekkja hann og dansa kóreugrafíur eftir hina ýmsu danshöfunda og kennara Kramhússins.

Shams el Amar aftur á móti er hópurinn hanns Mahers. Hann stofnaði þennann hóp árið 1994 í Danmörku og íslandsdeild sína árið 2004. Maher kennir í Kramhúsinu og eins og staðan er í dag eru flestar íslensku stelpurnar í hópnum líka í Raqs Sharki hópnum. Munurinn er samt sá, að Shams el Amar dansar eingöngu dansa eftir Maher og stíllinn er allt annar. Meira út í leikrænan "egyptian folklore", með einstökum blöndum af cairo poppi. Dansarnir hanns eru oft eins og leikrit og segja alltaf einhverja sögu. Þá vitiði það, ef þið voruð eitthvað confused!

Eeeeeenííiveis! Endilega kíkið á sýninguna okkar, við lofum stuði!! 1000 kr. inn við dyrnar!!

Jæja, nú er Maher búinn að vera hér í viku og 3 kg. farin.. Þetta er algert brjálæði ég er að dansa marga klukkutíma á hverjum degi. En mikið er það yndislega gaman!!!

Erum búnar að læra tvo dansa, einn mjög flottann stafadans og einn baladi, sem er mjöööög leikrænn. Hann fjallar um konu sem hættir með manni. Hún segist ekki vilja heyra í honum því orð hanns séu innantóm, hún vil ekki sjá hann og svo ætlar hún að kremja hjartað hanns. Þetta er allt túlkað í dansinum og með mikilli innlifun.

Svo er Vetrarhátið á fimtudaginn og í því tilefni verður Kramhúsið með dansveislu á Nasa kl. 21. Þar munum við sýna stafadansinn og svo mun ég taka dúett með Maher.  Verður alveg einstaklega gaman og hvet ég alla til að koma að sjálfsögðu!!